كتب الشاعر المبدع محمد عبد العزيز رمضان قصيده بعنوان حلمي أنجح
حلمي أنجح
كلمات الشاعر محمد عبد العزيز رمضان
حلمي أنجح ابقى حاجة
وامسك النجم بإيديا
نفسي القى نفسي تاني
نفسي أسبق نور عنيا
نفس اسأل يوم ألاقي
للسؤال دايما بقية
بس نجمي نجم عالي
نجمي صعب بعيد عليا
نجمي أصعب م الليالي
حلمي إنه يرضى بيا
حلمي أنجح أبقى حاجة
واهزم الخوف والظنون
وارسم الحلم لحياتي
لو هخاف إزاى هكون
هسقي حلمي بنور عنيا
مش هبيعه أو هخون
يكبر الحلم في ثواني
والورق يملى الغصون
حلمي أنجح أبقى حاجة
يرجع الحلم اللي مات
هقتل الوهم اللي عشش
جوا قلبي بالساعات
هقدر أهزم كل خوفي
وابتدي بقوة وثبات
مش هكون عبد لظروفي
اشتكي حظي اللي فات
همسك الحلم اللي عدى
مش هعيش في الذكريات
حلمي أنجح أبقى حاجة
ولطريقي مافيش رجوع
مهما ليل الحزن يطول
بكرا هنقيد الشموع
شمس بكرا علينا تطلع
تختفي كل الدموع
نقلع الآهات ونزرع
عزمنا وما فيش خضوع
للكسل واليأس نقلع
والأمل يصبح فروع
واللي عايز يبقى حاجة
راح يقف رغم الوقوع
تعليقات
إرسال تعليق